माते, उब तुझ्या पंखात..||

माते, उब तुझ्या पंखात..||

    उंच भरारी घेतली जरी,
    सुंदर नील नभात,
    मायेचा तव स्पर्श शोधितो,
    उब तुझ्या पंखात
    माते, उब तुझ्या पंखात..||

    किती सोसलेस तू पावसाळे,
    तरी मला कंठाशी कवटाळे,
    आज तुझे पाखरू भरारे,
    आत्मविश्वासे या जगात,
    माते, उब तुझ्या पंखात..||

    श्यामलाही तूच घडविशी,
    शिवबालाही तूच घडविशी,
    शिकवीशी दिघुला,
    'बाळा अश्रुंचीही फुले बनू शकतात',
    माते, उब तुझ्या पंखात..||

    अवीट गोडी देवदत्त ती,
    भरली तुझ्याच काळजात,
    विज्ञानालाही न कळे कधीही,
    काय तुझ्या हृदयात,
    माते, उब तुझ्या पंखात..||

    जागी सर्वसुखी मीच एकही,
    जागा मिळे मला अजुनही
    आईच्या पदरात,
    माते, उब तुझ्या पंखात..||